Letteratura Milanese
Scarica ! Mp3 poesia (Interpretazione di Antonio Bozzetti)	Carlo Porta
On Miracol (1815) Per giustizia di Dio, on giovinott Lussurios, porscell all'ultem segn, Che no l'eva mai pregn De passà el dì e la noce in barilott, El creppa, e el creppa, Dio ne guarda lor, In vun de quij moment Che a vorress regordà del nost Signor Che voeur on bel talent. L'anema sciolta de la carna morta La va, a vôl vers i stell, Che el dianzen le porta, E in manch de quella la se troeuva al pè Del tribunal tremend De Gesù Crist, che brusch in vôlt comè El ninna el cuu su on cossinon badial De nivol prepontaa de coo coi âl. Su la dritta l'arcangiol san Michee, Sul fà de quij che vend El formaj in Verzee El gh’a dessóra a on tavol lì denanz Carimaa, carta, penna e do balanz; Su la sinistra, sôra ona poltronna De velù crèmes cont i sbarr a intaj, Soa Majstaa la Madonna L'assist al gran giudizi del bagaj; In circol dedrevia, come a L'Arenna Dan ressalt a la scenna Cherubin, Serafin, Dominazion, Angiol, Arcangiol, Tron. L'aria l'è lustra che la par de ras, E i angiol del Signor La perfummen sgorand con tanti odor, Che per usmaj se vorrav vess tutt nas. Gesù el nínnava el cuu, come v’hoo ditt, Perchè Michee el gh'haveva già squajaa Tutta la tiritera di delitt Del pover desgraziaa; E ‘semma el dava ment a costù chì Ch'el tremava de foffa; 'Semma all'Angiol Custod, che el stava lì Pass cont giò i âl, come on usell che cova; E 'semma el varda el diavol, Che scrusciaa sotta al tavol El rideva a tutt rid, menand la cova. In sto de mezz, la Mader del Signor, Regordandes che el pover giovinott, Sebben gran peccador, L'eva staa impunemanch on so devott, E savend ben che l'eva scritt in l'abet, Che el digiunava el sabet, Per i soeu Sett dolor, e al lunedì El ne beveva on mezz Per i Sett allegrezz; Regordandes che indoss tutt quant el dì El tegneva el so offizi e la coronna; Che vedend el ritratt de la Madonna El levava el cappell; E che andand a bordell El scondeva a bon cunt sott al cossin La scerïoeura, el Crist, l'acquasantin: La se volta pressosa in vers al tôs E la ghe dis: « Pietaa, pietaa, Signor, In grazia mia sospend Quel giudizzi tremend! L'è on scorlacoo, l'è vera, on peccador, Ma te cuntett nagott El vess staa de toa mamma inscì devott? Ah, Signor, per sto venter Che t’haa portaa de denter, Per quij dolor che hoo avuu in del parturitt, Per sto coo, per sti tett, per sti boritt, Per sti man, per sti brasc che t’han portaa, Fassaa e nudregaa, Signor, te preghi, abbi pietaa, pietaa! ». Gesù Crist, che l'è a on segn de amor per lee Che in terra l'è impossibil de cognoss, Che l'è on amor che lassa finna indree Quel che portava el Bazzer al vin ross, El biassa on bott la lengua, el palpa i oeucc, El se carezza on poo La ponta del barbozz, el frega el coo, E poeu el dis: « Verament La legg l'è fada, e se dovess dà ascôlt Domà a la mia giustizia, Dovarev condannal al gran torment De vess priv de la vista del mè vôlt: Ma basta... per adess... Vedaremm... Quell però che me rincress, L'è che, essend giammò mort, L'impegn de davel salv l'è on poo tropp fort; Nonostant, per giustalla, hoo bell e vist Cont la divina ment, Che no gh’è che on de mezz... Citto lì! attent. Mì, padron de tutt coss, mì, Gesù Crist, Che col moeuv d'on mè brasc Poss favv tuce in spettasc; Mi che per vess Soa Divina Majstaa Poss pissà in lecc e dì che son sudaa, Comandi e vuj che st'anema che chì La torna in del so corp in sul moment, E appenna che l'è dent Che la se metta in man d'on confessor, Che ghe doo temp domà vintiquattr'or ». Dopo el se volta, tutt affettuos, A la Vergin Maria, E el ghe dis: « Credii pur che hoo faa per vù Quella mincionaria Che per mè Pader no la farev pù ». Scompar Iddio, i sant, i anger, i Tron, I nivol la Madonna, la poltronna, I balanz, san Michee, i Dominazion, E l'anema del gioven la ritorna In del so corp a fà la confession. Resta lì el diavol che, grattand i corna, El dis robba de ciod Adree all'Angiol Custod, E el tratta de giustizia bolgironna La giustizia divina, Concludend che per lu el n'aveva assee De struziass a servill sira e mattina, Quand dai moinn d'ona donna, Sibben ch’el fuss Gesù, El se lassava menà a bev anch lù. Con st'istoria, che franch la sarà vera, Perchè l'è scritta sóra al Praa Fiorii, Voeuren dì i pret che gh'è la soa manera De settass a cavall di duu partii; Idest che el so negozi l'è provist Anch de bontaa e pietaa de Gesù Crist.